– Ungdom er framleis engasjert i politikk, men det trengst nye kanalar for å fanga opp det politiske engasjementet deira. Det meiner forskar Guro Ødegård.
Ødegård er i desse dagar aktuell med boka «Motløs ungdom? Nytt engasjement i et gammelt demokrati.» Boka byggjer på doktoravhandlinga hennar om samfunnsengasjement blant ungdom.
Éin av konklusjonane i boka er at ungdom treng andre kanalar og arenaer for samfunnsengasjementet sitt.
– Frivillige ungdomsorganisasjonar har vore viktige trimrom og læringsarenaer for demokrati. Desse er framleis viktige, men det er færre unge som engasjerer seg i desse kanalane. Engasjementet til dei unge flyttar seg, og det politiske aktivitetsmønsteret tek nye former til eit meir aksjonsretta engasjement. Utfordringa er å skapa arenaer og kanalar for å fanga opp dei mange stemmene. Dette er ei utfordring for dei politiske partia og for demokratiet elles, seier forfattaren i ein samtale om boka på nettsidene til Institutt for samfunnsforsking. (NPK)
