Jannicke Velsvik (31) frå Velsvik i Volda er tilsett som produsent i Språkåret 2013.
Velsvik tar til i stillinga 5. november. 31-åringen frå Velsvik i Volda har ein bachelorgrad i kultur og leiing frå BI i Oslo, og avsluttar denne månaden ein mastergrad innanfor det same fagfeltet i Barcelona. I tillegg er Karine Munch (46) frå Bærum tilsett i vikariat som programansvarleg i Aasen-tunet.
– Eg gler meg til å fremje språkleg stoltheit og engasjement gjennom arrangement over heile landet, seier Jannicke Velsvik.
– Interessa for Språkåret 2013 blir berre større og større, og det er svært inspirerande å jobbe med dette prosjektet. Med produsenten på plass kan vi planleggje og gjennomføre endå fleire lokale og nasjonale arrangement, seier prosjektleiar Inger Johanne Sæterbakk i Språkåret 2013.
Sæterbakk peikar også på at ein no vil kunne jobbe endå tettare mot dei ulike språkmiljøa i landet, og med internasjonale perspektiv på den norske språksituasjonen.
Kulturdepartementet har bestemt at 2013 skal vere eit nasjonalt språkår som gir ei raus, inkluderande og samlande feiring av alt språk i Noreg med grunnlag i 200-årsjubileet for Ivar Aasen og 100-årsjubileet for Det Norske Teatret.
Frå før av arbeider prosjektleiar Inger Johanne Sæterbakk og prosjektsekretær Bente Lothe Eldholm for fullt med programmet til Språkåret 2013. 2. januar blir Språkåret 2013 opna med ei festførestelling i Kilden kulturhus i Kristiansand. Om lag 70 ulike samarbeidspartnarar er så langt involverte i Språkåret 2013.
