Leiar i Nei til EU, Heming Olaussen er ein av omlag 1700 som har meldt seg inn i Noregs Mållag etter nyttår. Han meiner det er viktig å sjå at nynorsken blir pressa.
Olaussen seier sjølv han er dialektbrukar frå Oslo aust og ikkje har eit veldig bevisst forhold til nynorsk, meir ein intuitiv sympati som han kallar det. Avgjerande for at han no melde seg inn i mållaget var også at han ikkje kunne motstå vervaren sin draum om 300 nye medlemmer.
– Mitt perspektiv er meir politikken i stort, kva krefter som vil styrke eller bygge ned både nynorsk og dialektbruk. Nynorsken som alle motkulturar blir pressa av sentralisering og elitisme. Det er viktig å vere stolt, slår han fast.
– Korleis kan ein styrke nynorsken framover?
– Det har ikkje eg tilstrekkeleg oversikt over, men kansje mållaget bør interessere seg for EØS-avtalen sin sentraliserande og distriktsnedbyggande effekt? Ein bør kanskje også vere nøye på kven ein stemmer på ved stortingsvalet i 2013?
I neste utgåve av LNK-avisa møter du fleire nye medlemmer i Noregs Mållag som har sterke meiningar om nynorsken.
