Den nye direktøren i Fritt Ord, Knut Olav Åmås (46), ønskjer å gjera stiftinga meir kjend også utanfor Oslo.
– Saman med styret vil eg sikra at Fritt Ord vert relevant for endå fleire i Noreg. Landet vårt ser nokså annleis ut utanfor Oslo, og Fritt Ord kan tenkja på korleis ein skal få nedslag fleire stader, seier Åmås til Dag og Tid.
Åmås har dei siste åtte månadene vore statssekretær i Kulturdepartementet og tek til som direktør i Fritt Ord til hausten, etter at karantenetida hans er over.
Fritt Ord er ei privat, allmennyttig stifting som har som mål å verna og styrkja ytringsfridommen og vilkåra for ytringsfridom i Noreg ved å stimulera til levande debatt og « uredd bruk av ordet», som det heiter i føremålet til stiftinga.
Fritt Ord kan også støtta andre sider ved norsk kultur, og den nye direktøren meiner mange ulike tiltak rundt om i landet kan vera aktuelle.
– Det Fritt Ord driv med – ytringsfridom, mediespørsmål, kunst, kultur, utdanning og stipend – er relevant for utruleg mange i ulike yrke og situasjonar, seier han.
Ifølgje Dag og Tid deler Fritt Ord kvart år ut til saman 100 millionar kroner til ulike prosjekt. (©NPK)
