Leiinga ved Universitetet i Bergen seier likevel ja til skilt på nynorsk.
– Då eg vart gjort merksam på denne saka, tenkte eg at me måtte få gjort noko med dette, seier universitetsdirektør Kari Tove Elvbakken til nettavisa På Høyden.
På Høyden har tidlegare skrive om den nye skilthandboka som slo fast at alle skilt ved UiB skal vere på bokmål.
– Skilt er tekst som har stor symbolverdi. I HF-bygget er det til dømes fellesskilting på nynorsk i dag. Dersom den nye handboka seier at me ikkje får lov til dette, er det ei dårlegare ordning enn den me har i dag, sa Arve Kjell Uthaug, administrasjonssjef ved Institutt for framandspråk til nettavisa ved universitetet.
Elvbakken lovar at arbeidet med å få nynorske skilt på plass allereie er i gang.
– Eg tenkjer at no må dei grunneiningane som vil ha skilt på nynorsk gi melding om det. I dag har me mellom anna Senter for vitskapsteori og Institutt for framandspråk, seier Elvbakken.
