Den låge straumprisen frå i sommar kjem aldri tilbake, meiner kraftanalytikar.

I sommar kopla Statnett straumnettet i Noreg og Nederland saman ved hjelp av NorNed-kabelen. Kabelen kan forsyne halve Oslo med straum. I tillegg kan Noreg importere straum til Danmark, Sverige, Finland og Russland. Fleire prosjekt er i planleggingsfasen.

– Sannsynet for låge straumprisar blir berre mindre og mindre når ein kan eksportere meir, seier kraftanalytikar Roger Lie i Hafslund til NA24.

Han forklarar at fleire kablar ut til område med høgare prisnivå vil gi generelt høgare prisnivå i Noreg.

Tilkoplinga til Kontinentet gjer straumforsyninga i Noreg mykje sikrare, men samtidig må ein leve med høgare pris, meiner Lie.

– Vi trur sjølvsagt at ein vil ta til seg prisane i dei marknadene ein bind seg opp mot. Prisskilnadene i Europa vil trekkje norske prisar oppover, og ein vil få ein meir samordna pris i Europa, samtykkjer marknadssjef i energianalyseselskapet Nena, Bjarne Gilhuus-Moe. (NPK)

Norsk Målungdom meiner fylkeskommunane må ta ein del av skulda for at elevar ved vidaregåande skular ikkje får nynorskbøker tidsnok.
Før helga vart det kjent at Møre og Romsdal ikkje bestilte bøkene før to dagar etter skulestart. Fleire fylker bestiller seint og bare ni fylker truar med bøter dersom bøkene ikkje blir levert i tide, melder NRK.

Leiar i Norsk Målungdom, Jens Kihl reagerer sterkt på at fylkeskommunane ikkje har bestilt bøkene i tide.

– Det er amatørmessig. Fylkeskommunane som sit med ein kvart milliard til innkjøp av læremidler, viser at dei ikkje kan utføre ein profesjonell jobb, seier Kihl til NRK.

Unge ledige i Noreg blir dytta over på trygd, meiner OECD.
Eit sjenerøst trygdesystem kombinert med høg terskel for å få arbeidsløysetrygd bidreg til å skuve arbeidsfør ungdom ut av arbeidsmarknaden, meiner Organisasjonen for økonomisk samarbeid og utvikling (OECD).

Dei to siste åra har 3.719 nye unge under 24 år hamna på uføretrygd her i landet. Og det er unge mellom 18 og 35 år som står for veksten i delen uføretrygda i befolkninga.

Direktør for arbeidslivspolitikk i NHO, Sigrun Vågeng, deler bekymringa til OECD:

– Det er noko med systemet vårt som ikkje legg til rette for arbeidsløysetrygd. I staden kjem ein veldig raskt over i ei trygdefelle. Då er overgangen til permanente trygdeordningar snublande nær, seier ho til Aftenposten. (NPK)

Breiband i Sogn og Fjordane kan kallast smalband, meiner stortingspolitikar Åge Starheim (Frp). Han synest fornyings- og administrasjonsminister Heidi Grande Røys (SV) bør stikke fingeren i jorda og vedgå at breibandkvaliteten i vestlandsfylket er for dårleg.

I Soria Moria-erklæringa lova regjeringa breiband til alle. Ifølgje rapporten «Bredbånd – dekningsanalyse 2008» vil 99,8 prosent ha eit breibandtilbod ved utgangen av året. Men regjeringa har ikkje definert ei spesifikk nedre grense for overføringskapasitet.

Ifølgje Starheim er det ikkje godt nok at omfanget av utbygginga er god, når kapasiteten på breibandet ikkje er tilfredsstillande.

– Her har då statsråd Heidi Grande Røys skrytt over kor godt det er bygt ut. Så viser det seg at det knapt kan kallast breiband. Det rette hadde vore smalband, seier Starheim til NRK Sogn og Fjordane. (©NPK)

Les om Jan Roar Leikvoll som debuterer på nynorsk med romanen «Eit vintereventyr». Det gir han Jon Fosse æra for.

På spørsmål om kvifor det var ein roman svarer Leikvoll dette til Dagsavisen:

– Det overraska meg også. Tidlegere hadde eg prøvd meg på dikt, og eg ante ikkje at eg var i stand til å skrive ei lengre, samanhengande forteljing. Men noko løsna då eg byrja å skrive på nynorsk. Det var faktisk Jon Fosse som føreslo at eg skulle skifte over frå bokmål til nynorsk. Eg skreiv nemleg eit brev til han etter å ha lest «Melancholia», seier han.

Les meir i Dagsavisen.

Noreg brukar for mykje pengar på skule og utdanning i høve til kva dei får tilbake for satsinga, meiner OECD.
Organisasjonen for økonomisk samarbeid og utvikling (OECD) offentleggjorde onsdag ein ny rapport der dei meiner det er både mogleg og naudsynt for Noreg å få meir ut av pengane som blir investerte i skulen.

– Noreg får ikkje tilstrekkeleg ut av pengane som blir brukte på utdanning. Det obligatoriske utdanningssystemet ser ikkje ut til å vere kostnadseffektiv etter internasjonale standardar, heiter det i rapporten.

Dei meiner det må opnast for fleire elevar i kvar klasse og større skular for å frigjere pengar som kan brukast til å auke kvaliteten på utdanninga. Dei tek også til orde for å skjerpe krava til lærarutdanninga og å auke satsinga på etter- og vidareutdanning av lærarar.

OECD kritiserer også bruken av eksperimentelle undervisningsmetodar, som organisasjonane meiner har vist seg å vere ineffektive og stiller for slappe krav til elevane. (NPK)

Lindgren på nynorsk

Av LNK NYTT 21.aug.2007

I haust kjem Astrid Lindgrens Mio, min Mio på nynorsk for første gong.

Det er forlaget Damm som gir ut boka som kjem som hovudbok i Blåmann Barnebokklubb i oktober.

– Vi har alltid ønskt å kunne tilby nynorske utgåver av Astrid
Lindgrens fantastiske bøker, og har lenge hatt ein dialog med Damm om
dette, seier bokklubbredaktør Erle Stokke i ei pressemelding.

Det var i samband med 100-årsjubileumet for Astrid Lindgren i fjor at
tanken på ei nynorsk utgåve av barneboka vart lansert. På haustlista
til Blåmann Barnebokklubb finn ein også forfattarar som Roald Dahl,
Lene Kaaberbøl og Rune Belsvik.

NVE lovar olje- og energiministeren å skru opp farten på handsaminga av konsesjonssøknader for små kraftverk.

Olje- og energiminister Terje Riis Johansen vil ha fleire småkraftverk. No lovar direktør for konsesjons- og tilsynsavdelinga Rune Flatby å få opp farten. Men det skal ikkje gå så fort at det blir gjort dårlege vedtak.

– I sakshandsaminga er mykje styrt av lovverket. Det skal vere høyringar og synfaringar, og det tar tid, seier han til Nationen.

Riis-Johansen ser seg sjølv som forkjempar for utbygging av småkraftverk, og meiner auken i talet på søknader viser at ein er på rett veg.

NVE har tilsett fleire sakshandsamarar, noko som saman med ei kontinuerleg forbetring av sakshandsamingsprosessen skal korte ned ventetida for kraftverkutbyggjarane. (NPK)

Fylkeskommunane må, ei eigenskap av å vere skuleeigarar, bruke marknadsmakta si slik at elevane får skulebøker til skulestart. Det seier Noregs Mållag i ei pressemelding.

– Fylkeskommunane har ei passiv haldning og brukar ikkje sanksjonar i innkjøpsavtalane sine for å sikre at nynorskbøkene er ferdige ved skulestart, seier Hege Myklebust, leiar i Noregs Mållag.

No krev både Noregs Mållag og Norsk Målungdom at fylkeskommunane tvingar forlaga til å produsere nynorskutgåver av skulebøker samstundes med bokmålsbøkene gjennom forpliktande avtalar.

– I år får fylkeskommunane 223 millionar kroner for å kjøpe inn lærebøker til elevane. Ingen andre kundar ville bruke slike summar utan å stille krav til seljaren, eller godta at vara har så store manglar, seier Jens Kihl.

Mållaget og Målungdommen får i dag støtte av Språkrådet. Rådet krev og at Utdanningsdirektoratet må skaffe seg oversikt over skuleboksituasjonen på eit mykje tidlegare tidspunkt.

Legg ned Kvinnebasen.no

Av LNK NYTT 18.aug.2008

Nettstaden Kvinnebasen.no vert lagt ned 1. september. Databasen har i ni år synleggjort leiar- og styrekompetanse hos kvinner.

Kvinnebasen.no blei opna 17. juni 1999, og har i åra som har gått hatt fleire tusen brukarar, både frå offentleg og privat sektor.

Kvinnebasen omfattar 3.500 kvinner og vert administrert av Nav, som i vår bad Arbeids- og inkluderingsdepartementet finne ein annan eigar. Departementet avgjorde i samråd med Barne- og likestillingsdepartementet, at basen skal leggjast ned, blant anna fordi det finst fleire andre basar som til ein viss grad dekkjer same behov.

Alle kvinner som er registrert i Kvinnebasen.no blir informert direkte om avviklinga. (©NPK)

Nynorsksenteret lanserer eigen nettstad med nynorske teikneseriar til bruk i norskfaget.

På nettstaden finst både ferdige teikneseriar og ressursar til å utvikle eigne seriar. Norske serieskaparar bidreg og med tips og råd til unge som har lyst til å byrje å teikne og skrive sjølv.

Lenke til nettstaden hjå Nasjonalt senter for nynorsk i opplæringa finn du her.

Edmund Austigard er årets mottakar av Sigmund Skard-stipendet på 25.000 kroner som Det Norske Samlaget deler ut.

Stipendet skal gå til ein forfattar som har gitt ut minst ei bok med høg litterær kvalitet dei siste fem åra. Austigard får prisen for det som på mange vis teiknar å bli ein forfattarskap som både er frodig, original og svært humoristisk, meiner juryen.

Edmund Austigard debuterte i 2005 med kollektivromanen «Krinsereglane». Ei original bygdeskildring av livet i Årdal i Ryfylke i 1924. I fjor gav han ut bok nummer to, «Taxi for B. A. Beckström – eller kunsten å danse på furu». Her tek han den surrealistiske, samfunnskritiske satiren fleire hakk lenger. Vi følgjer den 92 år gamla hovudpersonen på si livs største reise, ein taxitur til ei døyande tante i Sverige.

Samlaget har delt ut Skard-stipendet sidan 1995 og vil markere den rolla Sigmund Skard har spelt for nynorsken og for forlaget. Han var knytt til forlaget det meste av livet, som forleggjar, styreformann og ikkje minst forfattar. (©NPK)