– Kommunane i Sunnhordland bør satse på samarbeid for å kunne hjelpe etablerarane på den beste måten, meiner nærings – og utviklingssjef i Bømlo kommune, Magne Raknes.
Satsar på språkglede
– Born må møte både nynorsk- og bokmålbøker i barnehagen, uavhengig av kvar dei bur i landet, seier leiar i Noregs Mållag, Håvard B. Øvregård.
Krev betre nynorsk i digitale læremiddel
Digitale læremiddel for vidaregåande skule held ikkje mål språkleg. No må noko gjerast, krev nynorskorganisasjonane.
Nynorsk kan bli redninga for Blindern-tidsskrift
Fleire artiklar på nynorsk kan bety meir pengar for det kriseramma Blindern-tidsskriftet Argument. No blir dei skrivande medarbeidarane sett på skulebenken for å finpusse nynorsken sin.
Norske vegar forfell igjen
Tiltakspakken etter finanskrisa medførte godt vedlikehald av vegnettet i fjor. Men i år slår det sprekkar igjen, spår Statens vegvesen.
Språkdirektøren
Sylfest Lomheim (65) meiner Språkrådet bør jobba med haldningane me har til språket vårt. Til sommaren går han av som språkdirektør.
– Korleis blir det å gå av som språkdirektør?
– Både fint og vemodig – slik det skal vera. Fint fordi eg må vera ærleg nok til å seia at det på desse snart sju åra har skjedd det med Språkrådet og språkpolitikken som eg hadde vona. Vemodig fordi det er ein viktig arbeidsperiode – sikkert den viktigaste i livet mitt – som no i 2010 blir avslutta.
– Kva er den største utfordringa for nynorsken framover?
– Det er (for å ta ein Kolberg, jamfør ein tale han heldt på landsmøtet): produksjon – produksjon – produksjon! Det må produserast tekster på nynorsk, så mykje som råd, og med så godt språk som råd. Manglande lærebøker på nynorsk, manglande artiklar på nynorsk i VG, manglande nynorsk i turistbrosjyrar frå Hardanger; alt dette utgjer det største overgrepet på det nynorskbrukande mindretalet. Utan at folk les nynorsk, kan dei ikkje skriva nynorsk.
– Korleis kan ein få fleire aktørar i næringslivet til å bruke nynorsk?
– Ved å få næringslivsleiarar til å forstå at innteningsevna i mange samanhengar, men ikkje alle, kan bli betre ved å satsa på nynorsk
– De har nettopp lagt fram Språkstatus 2010. Kva er dei største trekka der?
– Det blir brukt stadig mindre norsk i høgre utdanning og forsking, kvaliteten på læremiddel i norskfaget er i ein del tilfelle uakseptabel dårleg, elevane både rettar og ler, kvar fjerde ungdom trur at engelsk er eit betre språk enn norsk, men popartistane bruker meir norsk i tekstene sine i 2010 enn for fire-fem år sidan.
– Kva har vore din språklege kampsak?
– Endra folks oppfatning av Språkrådet og språkpolitikken
– Kva er den største utfordringa for språkutviklinga i Noreg?
– Det er å ta vare på norsk skriftspråk som eit fullverdig og funksjonelt uttrykksmiddel for oss som bur i Noreg
– Kva betyr målrørsla for deg?
– Ho har vore min einaste trufaste åndelege følgjesvein i livet sidan eg forlét gardstunet på Lomheim som 19-åring. Andre grunnsyn og retningar kan ha veksla litt.
– Korleis kan ein stimulera til meir nynorsk i barnehagen?
– Nynorsk i barnehagen er eit middel – ikkje eit mål – for å utvikla så slitesterke haldningar til morsmålet at dei held livet ut. Berre fantasien set grenser for korleis ein gjennom song og leik kan byggja opp haldningar til språk i barnehagen. Bokstavering og ”skule” i den alderen bør det ikkje vera mykje av. Det er ikkje godt for utviklinga, sjølv om mange vaksne trur det.
– Tre av fire statsorgan bryt mållova. Kva kan ein gjera med det?
– Svaret er enkelt: gjennom politisk styring frå statsråden og nedover. Etatsleiarar må ikkje få høve til å gløyma kva dei har som ansvar.
– Kva trur du om framtida til nynorsken?
– Den er god nok dei neste hundre år, berre nynorskbrukarane brukar nynorsk.
– Kva bør Språkrådet arbeide med framover?
– Kvaliteten på norskundervisninga frå barnehage til vidaregåande, gode fagspråk på norsk i høgre utdanning og ein heil haug med andre ting – men først og sist: haldningar, haldningar, haldningar!
AKTUELT
Namn: Sylfest Lomheim
Bur: Oslo/Kristiansand
Aktuell: Til sommaren går han av som direktør i Språkrådet, etter sju år i jobben.
Språk: På jobb i Språkrådet skriv Lomheim både bokmål og nynorsk. Elles berre nynorsk.
Alder: 65
Ulfsby ny teatersjef
Erik Ulfsby (39) er tilsett som ny teatersjef ved Det Norske Teatret. Han vil gjerne satse på nyskapande teater.
Heidra profil
Han skriv ikkje for å tekkast publikum. Einar Økland (70) meiner kunsten skal stå på eigne bein.
Ryddar i språket
Ragnhild Bjørge (32) ynskjer seg meir orden i nynorsken. No skal ho vera med og lage den nye rettskrivingsnorma.
Få nynorskstudentar i Oslo
På Universitetet i Oslo er det berre om lag 2,5 prosent av studentane som melder at dei ynskjer nynorsk som hovudmål. Studiedirektør Monica Bakken meiner likevel det ikkje er naudsynt med rekrutteringstiltak.
Søkjer etter ny språkdirektør
Direktør i Språkrådet, Sylfest Lomheim, går av 1. juli etter utgått åremål. Kulturdepartementet søkjer no etter ein etterfølgjar.